शनिबार नेपालगन्ज महोत्सवमा १८ हजार भन्दा बढी दर्शकको उपस्थिति

बाँके। नेपालगन्ज उद्योग वाणिज्य संघद्वारा आयोजित प्रादेशिक महोत्सव यतिबेला दर्शकको भीड देखिन थालेको छ । आज शनिबार महोत्सवमा करिब १८ हजार भन्दा बढी दर्शकको उपस्थिति रहेको आयोजक टिमले जनाएको छ । महोत्सवमा दर्शकको भीड बढेसँगै महोत्सवमा राखिएका स्टलहरुमा समेत व्यापार बढेको छ ।

शनिबार महोत्सवमा चर्चित गायिका ज्योति मगरको बेजोड प्रस्तुति रहेको थियो । महोत्सवमा चर्चित गायिका ज्योतिले ‘बैस हरलक्कै सोल्टी सर्लक्कै ‘ बोलको गीत गाएपछि दर्शकहरु उनको प्रस्तुति सँग झुमेका थिए । त्यस्तै महोत्सवमा उपस्थित दर्शक ज्योतिको चर्चित गीत जाले रुमाल भन्ने गीतमा लय सँगै रमाउन थालेका थिए । त्यसोत ज्योतिको दर्शकसँग जिस्किने बानीले झनै दर्शकलाई भरपूर मज्जा गराएको थियो। साथै ज्योतिले उनको चर्चित गीत कान्छी मुसुक्कै भन्ने गीतमा उनीसँगै दर्शक गाउँदै रमाइलो गरेका थिए । त्यस्तै मेलामा हास्य कलाकार दमन रूपाखेतीको कमेडी स्टाइलमा दर्शकहरुले इञ्ज्वे लिएका छन् ।

भोलि आइतबार १३ गते नेपालगन्ज महोत्सवमा नायक पल शाह,चर्चित गायिका शान्तिश्री परियारको साथमा थारु तथा आधुनिक गायिका अन्नु चौधरीको कडक प्रस्तुति रहने आयोजक टिमले जनाएको छ । दिनप्रतिदिन चर्चित कलाकारको प्रस्तुति रहने यस महोत्सवमा आगामी दिनमा पनि दर्शकको यस्तै माया पाइने आयोजक टिमले विश्वास व्यक्त गरेको छ ।

महोत्सवमा आगन्तुक दर्शकहरु मेलामा राखिएको स्टल घण्टौं समय लगाएर अवलोकन गर्दै गरेको फोटोहरु सामाजिक सञ्जाल मार्फत देख्न सकिन्छ ।

महोत्सव माघ १० देखि शुरू भएको माघ २२ गते सम्म सञ्चालनमा रहनेछ ।